Viza suhbatida yo‘l qo‘yiladigan eng keng tarqalgan xatolar

Chet elda o‘qish rejasi bor har bir abituriyent uchun viza suhbati — butun jarayonning eng mas’ul bosqichi. Ko‘pchilik hujjatlari ideal bo‘lsa ham, aynan suhbat vaqtida qilgan kichik xatolari sababli rad javobi oladi. Quyidagi omillar eng ko‘p uchraydigan kamchiliklar hisoblanadi.

Birinchi xato — sun’iy gapirish yoki yodlangan javoblar. Konsulga samimiylik muhim. Yodlab olgan matnni aytish tabiiy emas va sizning maqsadingiz shubhali ko‘rinishi mumkin. O‘z rejalaringizni sodda, lo‘nda va ishonchli aytgan ma’qul.

Ikkinchi muammo — moliya manbaini aniq tushuntira olmaslik. Talaba ko‘p hollarda “ota-onam sponsor” deb javob beradi, lekin detallarni bilmaydi. Mablag‘ qayerdan, qanchasi o‘qishga, qanchasi yashashga yetishi bo‘yicha aniq va real tushuntirish bo‘lishi kerak.

Uchinchi xato — kelajak rejasini aniq aytolmaslik. Konsul sizning o‘qishni tugatgach vatanga qaytish niyatingizga ishonmoqchi bo‘ladi. “Hali bilmayman” kabi javoblar salbiy ta’sir qiladi.

To‘rtinchi xato — ortiqcha hayajon va keraksiz izohlar. Ba’zi talabalar oddiy savolga juda uzun javob berib, chalkashib ketadi. Suhbat qisqa bo‘ladi, shuning uchun qisqa va aniq javoblar eng to‘g‘ri yo‘l.

Va nihoyat, beshinchi xato — hujjatlarni tartibsiz olib kelish. Konsul har bir savolni aniq javob va mos hujjat orqali tasdiqlashingizni kutadi.

Agar ushbu xatolardan qochsangiz, viza suhbatidan bemalol o‘tish imkoniyatingiz sezilarli oshadi.